ﻓﻲ ﻳﻮﻡ ﻣﻦ ﺍﻻﻳﺎﻡ ﻓﻲ ﺣﺪ ﺍﺩﺍﻧﻲ ٥ ﺟﻨﻴﻪ ﻣﻘﻄﻌﺔ وقديمة ، ﺍﻟﻠﻪ ﻳﺴﺎﻣﺤﻪ ﺍﻟﻠﻲ ﻟﺒّﺴﻬﺎﻟﻲ ﺑﻘﻰ، ﺣﺎﻭﻟﺖ ﺃﺧﻠﺺ ﻣﻨﻬﺎ ﻛﺘﻴﺮ ﻭﻣﻌﺮﻓﺘﺶ، ﻛُﻞ ﻣﺎ ﺃﻗﻒ ﻋﻨﺪ ﻛُﺸﻚ ﺃﺟﻴﺐ ﺣﺎﺟﺔ ﺍﻟﻠﻲ ﻭﺍﻗﻒ ﻳﻘﻮﻟﻲ " ﺷﻮﻓﻠﻲ ٥ ﺟﻨﻴﻪ ﻏﻴﺮ ﺩﻱ " ، ﻛُﻞ ﻣﺎ ﺃﺭﻛﺐ ﻣﻴﻜﺮﻭﺑﺎﺹ ﺃﺷﺪ ﻣﻊ ﺍﻟﺴﻮﺍﻕ ﻭﺃﺿﻄﺮ ﺃﻓﻚ ١٠٠ ﺟﻨﻴﻪ ﻋﺸﺎﻥ ﺃﺟﺮﺓ ﺟﻨﻴﻪ ﻭﻻ ﺟﻨﻴﻪ ﻭﺭﺑﻊ، ﺣﺘﻰ ﻣﺤﻄﺎﺕ ﺍﻟﺒﻨﺰﻳﻦ ﺍﻟﻠﻲ ﺑﻴﺎﺧﺪﻭﺍ ﺃﻱ ﻓﻠﻮﺱ ﻣﺮﺿﻴﻮﺵ ﻳﺎﺧﺪﻭﻫﺎ، ﻟﺪﺭﺟﺔ ﺇﻧﻲ ﻑ ﻣﺮﺓ ﺣﺎﻭﻟﺖ ﺃﺩﻳﻬﺎ ﻟﺸﺤﺎﺕ ﻓﺒﺼﻠﻲ ﺑﺼﺔ ﺻﻌﺒﺔ ﺃﻭﻱ ﻭﻛﺴﻔﻨﻲ ﺟﺪًﺍ، ﻑ ﺍﺩﻳﺘﻪ ﻏﻴﺮﻫﺎ ﻭﻓﻀﻠﺖ ﺃﻧﺎ ﻻﺑﺲ ﻓﻴﻬﺎ.. ﺍﻗﺘﻨﻌﺖ ﺇﻧﻲ ﺧﻼﺹ ﻣﺶ ﻫﻌﺮﻑ ﺃﺧﻠﺺ ﻣﻨﻬﺎ، ﻭﺑﻄﻠﺖ ﺃﺣﺎﻭﻝ ﺃﺻﺮﻓﻬﺎ، ﻓﻀﻠﺖ ﺷﺎﻳﻠﻬﺎ ﻑ ﺍﻟﻤﺤﻔﻈﺔ ﻭﺃﻧﺎ ﻣﺶ ﻣﻌﺘﺒﺮﻫﺎ ﻓﻠﻮﺱ، ﻣُﺠﺮﺩ ﻭﺭﻗﺔ ﻑ ﺍﻟﻤﺤﻔﻈﺔ ﻭﺧﻼﺹ، ﻓﻠﻮﺱ ﺗﺮﻭﺡ ﻭﻓﻠﻮﺱ ﺗﻴﺠﻲ، ﻓﻠﻮﺱ ﻋﻴﺪﻳﺔ ﻭﺃﻭﻝ ﻣﺮﺗﺐ ﻭﺃﻭﻝ ﺗﻴﺒﺲ، ﻓﻠﻮﺱ ﺣﻮّﺷﺘﻬﺎ ﻭﺟﺒﺖ ﺑﻴﻬﺎ ﻣﻮﺑﺎﻳﻞ ﻭﻓﻠﻮﺱ ﻭﻗﻌﺖ ﻣﻨﻲ ﻭﺍﺗﺤﺴﺮﺕ ﻋﻠﻴﻬﺎ، ﻛُﻞ ﺩﻩ ﻭﻫﻲّ ﺯﻱ ﻣﺎ ﻫﻲّ، ﻣﻜﺎﻧﻬﺎ ﺛﺎﺑﺖ ﻣﺒﻴﺘﻐﻴﺮﺵ، ﻋُﻤﺮﻫﺎ ﻣﺎ ﺣﺴﺴﺘﻨﻲ ﺇﻥ ﻣﺤﻔﻈﺘﻲ ﻓﺎﺿﻴﺔ، ﺣﺘﻰ ﻟﻮ ﻓﻠﻮﺳﻲ ﻛُﻠﻬﺎ ﺧﻠﺼﺖ ﻛُﻨﺖ ﺩﺍﻳﻤًﺎ ﻫﻼﻗﻲ ﺍﻝ ٥ ﺟﻨﻴﻪ ﺍﻟﻘﺪﻳﻤﺔ ﺑﺘﺎﻋﺘﻲ ﻗﺎﻋﺪﺓ ﺟﻮﻩ ﻭﻣﺮﺑﻌﺔ، ﺩﺍﻳﻤًﺎ ﻣﻮﺟﻮﺩﺓ ..ﻟﺤﺪ ﻣﺎ ﻣﻦ ﻓﺘﺮﺓ ﻛُﻨﺖ ﻣﻌﺪّﻱ ﻋﻠﻰ ﻛُﺸﻚ، ﺻﺎﺣﺒﻪ ﻭﺍﺣﺪ ﻣﻌﺮﻓﺔ، ﻭﻛﺎﻥ ﻧﻔﺴﻲ ﻑ ﻛﻴﺲ ﺍﻟﺸﻴﺘﻮﺱ ﺃﺑﻮ ٥ ﺟﻨﻴﻪ،
ﺃﺩﻳﻬﺎﻟﻪ ﻭﻻ ﺇﻳﻪ؟ ! ﻣﺶ ﺩﻱ ﺍﻝ ٥ ﺟﻨﻴﻪ ﺍﻟﻠﻲ ﻛُﻨﺖ ﻫﻤﻮﺕ ﻭﺃﺧﻠﺺ ﻣﻨﻬﺎ ؟! ﻣﺶ ﺩﻱ ﺍﻝ ٥ ﺟﻨﻴﻪ ﺍﻟﻤﻘﻄﻌﺔ ﺍﻟﻤﻠﺰﻗﺔ ﺍﻟﻠﻲ ﺣﺎﻟﺘﻬﺎ ﺑﺎﻟﺒﻼ ؟! ﻟﻴﻪ ﻫﺎﻳﻦ ﻋﻠﻴّﺎ ﺇﻧﻲ ﺃﺩﻳﻬﺎﻟﻪ ﺃﻭﻱ ﻛﺪﻩ ؟! ﻟﻴﻪ ﺣﺎﺳﺲ ﺇﻧﻲ ﻣﺶ ﻋﺎﻳﺰ ﺃﺩﻳﻬﺎﻟﻪ !! ﺍﺳﺘﻌﺒﻄﺖ ﻧﻔﺴﻲ ﺃﻭﻱ ﻑ ﻟﺤﻈﺘﻬﺎ، ﻭﺍﺑﺘﺴﻤﺖ ﻭﺍﺩﻳﺘﻬﺎﻟﻪ ﻭﺧﺪﺕ ﻛﻴﺲ ﺍﻟﺸﻴﺘﻮﺱ ﻭﻣﺸﻴﺖ، ﺗﺎﻧﻲ ﻳﻮﻡ ﻭﺃﻧﺎ ﻧﺎﺯﻝ ﺑﻔﺘﺢ ﺍﻟﻤﺤﻔﻈﺔ ﻋﺸﺎﻥ ﺃﺣﻂ ﻓﻴﻬﺎفلوس ﻣﻠﻘﺘﺶ ﺍﻝ ٥ ﺟﻨﻴﻪ، ﺍﺗﺨﻀﻴﺖ ﻭﻗﻠﺒﻲ ﺍﺗﻘﺒﺾ، ﺍﻓﺘﻜﺮﺗﻬﺎ ﻭﻗﻌﺖ ﻣﻨﻲ، ﻭﺑﻌﺪﻳﻦ ﺍﻓﺘﻜﺮﺕ ﺇﻧﻲ ﺻﺮﻓﺘﻬﺎ ﺍﻣﺒﺎﺭﺡ ﻭﻛُﻨﺖ ﻧﺎﺳﻲ، ﻭﺇﻧﻲ ﻣﺶ ﻫﺸﻮﻓﻬﺎ ﻑ ﻣﺤﻔﻈﺘﻲ ﺗﺎﻧﻲ، ﻭﺣﺴﻴﺖ ﺳﺎﻋﺘﻬﺎ ﺇﻧﻲ ﺯﻋﻼﻥ ..
ﺻﺪﻗﻴﻨﻲ ﺃﻧﺎ ﻋﺎﺭﻑ ﺇﻥ ﺇﺣﻨﺎ ﻣﺶ ﻣُﻨﺎﺳﺒﻴﻦ ﻟﺒﻌﺾ، ﻋﻴﻮﺑﻚ ﻛﺘﻴﺮ ﻭﻋﻴﻮﺑﻲ ﺃﻛﺘﺮ، ﻭﻣﻜﻨﺎﺵ ﻣﺴﺘﺤﻤﻠﻴﻦ ﺑﻌﺾ ﺃﺳﺎﺳًﺎ،
ﺑﺲ ﺩﻩ ﻣﻴﻤﻨﻌﺶ ﺇﻧﻲ ﻛُﻞ ﻓﺘﺮﺓ ﺑﻔﺘﺢ .." ﻣﺤﻔﻈﺘﻲ " ﻭﺃﺩﻭّﺭ ﻋﻠﻴها ﺟﻮﺍﻫﺎ، ﺩﻩ ﻣﻴﻤﻨﻌﺶ ﺇﻧﻲ ﻛُﻞ ﻣﺎ ﺑﺸﻮﻑ ﻭﺍﺣﺪﺓ ﺷﺒﻬا ﺑﺒﺘﺴﻢ ﻭﺃﻓﺘﻜﺮها ﻭﺍهيا ﺑﺘﻄلع ﻋﻴﻨﻲ ﻛُﻞ ﻳﻮﻡ، ﻣُﻤﻜﻦ ﺃﻛﻮﻥ ﺍﺗﺨﻠﻴﺖ ﻋنها، ﺣﻘﻴﻘﻲ ﻣُﻤﻜﻦ ﺃﺑﻘﻰ ﻣﺶ ﻋﺎﻳﺰها ﺗﺮﺟﻌﻠﻲ، ﺑﺲ ﺩﻩ ﻣﻴﻤﻨﻌﺶ ﺇنها ﺑﺘﻮﺣﺸﻨﻲ، ﻭﺇﻧﻲ ﻣﻦ ﺣﻘﻲ ﺃﺣﻦ ﻛُﻞ ﻓﺘﺮﺓ ﻭﺃﻓﺘﻜﺮها، ﻭﺇﻧﻲ ﺣﻘﻴﻘﻲ ﻧﻔﺴﻲ ﺃﻃﻤّﻦ ﻋﻠﻴها، ﻷ ﺃﻧﺎ ﻓﻌﻠًﺎ ﻫﻄﻤّﻦ ﻋﻠﻴها ..
ﻋﺪﻳﺖ ﻣﻦ ﻳﻮﻣﻴﻦ ﻋﻠﻰ ﺻﺎﺣﺐ ﺍﻟﻜﺸﻚ ﺇﻳﺎﻩ ﻭﺍﺷﺘﺮﻳﺖ ﻣﻨﻪ ﺣﺎﺟﺔ ﻭﺍﻟﻜﻼﻡ ﺟﺎﺏ ﻛﻼﻡ، ﻭﺑﻌﺪﻳﻦ ﻗﻠﺘﻠﻪ " ﻓﺎﻛﺮ ﺍﻝ ٥ ﺟﻨﻴﻪ ﺍﻟﻤﻘﻄﻌﺔ ﺍﻟﻠﻲ ﺍﺩﻳﺘﻬﺎﻟﻚ ﻣﻦ ﻛﺎﻡ ﺷﻬﺮ؟ ! ﻗﻮﻟﻲ ﻫﻲّ ..ﻫﻲّ ﻟﺴﺔ ﻣﻌﺎﻙ ؟!
ﺭﺩ ﻭﻗﺎﻟﻲ " ﻳﺎﺍﺍﻩ ، ﻣﻌﻘﻮﻝ ﻟﺴﺔ ﻓﺎﻛﺮﻫﺎ؟ ! ﻳﺎ ﺭﻳّﺲ ﺍﻧﺴﺎﻫﺎ ﺧﻼﺹ، ﺩﻱ ﺭﺍﺣﺖ ﻟﺼﺎﺣﺐ ﻧﺼﻴﺒﻬﺎ "!
ﺍﺑﺘﺴﻤﺖ ﻏﺼﺐ ﻋﻨﻲ، ﻭﺑﻌﺪﻳﻦ ﻗﻠﺘﻠﻪ " ﻭﺍﻟﻠﻪ ﺃﻧﺎ ﻣﺶ ﻣُﻌﺘﺮﺽ، ﺃﻧﺎ ﻣﺒﺴﻮﻁ ﻭﺍﻟﻠﻪ ﺇﻧﻬﺎ ﺑﺘﺘﺼﺮﻑ ﻭﺑﺘﺮﻭﺡ ﻭﺑﺘﻴﺠﻲ، ﺃﺣﺴﻦ ﻣﺎ ﺗﻔﻀﻞ ﻑ ﻣﺤﻔﻈﺔ ﻭﺍﺣﺪ ﻣﺶ ﻣﻘﺪّﺭﻫﺎ ﻭﻣﻘﻔﻮﻝ ﻋﻠﻴﻬﺎ، ﺑﺲ ﻣﻘﺪﺭﺵ ﺃﻧﺴﺎﻫﺎ ﺻﺪﻗﻨﻲ، ﺃﺻﻞ ﺍﻟﻠﻲ ﺑﻴﻨﻲ ﻭﺑﻴﻨﻬﺎ #ﻋِﺸﺮﺓ ، ﻭﺍﻟﻌِﺸﺮﺓ ﻣﺘﻬﻮﻧﺶ ﺇﻻ ﻋﻠﻰ ﻣﻴﻦ ؟ "!
"- ﻭﻻﺩ ﺍﻟﺤﺮﺍﻡ -"
#اتمنى تكون وصلت
